Macedonian
English
Акција Здруженска, го предизвика Парламентот да ги искористи сите расположиви механизми за политичка контрола и надзор над Владата, оценувајќи дека е недозволиво за еден носител на исклучително влијателна функција, во јавен говор од позиција на претседател на Владата на РМ, правата на жените да ги проблематизира и претставува како искривена вредност и бесполезно трошење енергија.
Доставивме писмо до сите парламентарци со кое од нив побаравме иницирање јавна парламентарна дебата, со која ќе го преиспитаат начинот на кој Претседателот на Владата на РМ го исполнува својот уставен и законски мандат, надлежност и обврска за обезбедување услови за спречување на дискриминација по било која основа, вклучувајќи ја и сексуалната ориентација; активна промоција на човековите права како универзална вредност, вклучувајќи ги и човековите права на жените; како и развивање и спроведување политики за постигнување на родовата еднаквост.
Потсетуваќи ги на политичката и законската обврска, ги повикавме парламентарците да го повикаат на отчет Премиерот кој си дозволи минимизирање и експлицитното отфрлање на приниципите и вредностите вградени во меѓународното право, Уставот на РМ и законите. Ова сметаат дека ќе има далекусежни последици за веќе несериозниот третман и институционален одговор на проблемот на родовата нееднаквост и нееднаквите права, статусот и положбата на жените во РМ.
