Воспоставување позитивни практики за справување со семејното насилство во Македонија

Целта на проектот, кој се спроведува во партнерство со Здружението за еманципација, солидарност и еднаквост на жените на Р. Македонија- ЕСЕ е да придонесе во воспоставувањето на лесно пристапен и ефикасен координиран систем за заштита на жртвите од семејно насилство во Македонија, преку промовирање специфични политики и процедури за интервенција кај актерите вклучени во граѓанскиот и кривичниот систем за заштита како и воспоставување стандарди за постапување кај НВО/ институциите кои обезбедуваат директни услуги за жртвите од семејно насилство. Специфични цели: Воспоставување процедури и протоколи за постапување на професионални групи и стандарди за НВО во случаи на семејно насилство; Зголемување на свеста и надградба на вештините помеѓу професионалните групи и НВО за соодветна интервенција во случај на семејно насилство; Стимулирање на релевантните засегнати страни во развивањето концепт за мултидисциплинарен приод и систем за упатување на жртвите од семејно насилство. Клучни активности: Подготовка на внатрешни процедури и протоколи за постапување кај полицијата, НВО, социјалните и здравствените работници; Подготовка на процедури и протоколи за предлагање, изрекување, следење и известување по привремените мерки за заштита на институциите вклучени во граѓанскиот систем за заштита од семејно насилство; Подготовка на стандарди за оперирање на институциите/ организациите кои обезбедуваат директни услуги на жртвите од семејно насилство; Подготовка на процедури и протоколи за унифициран пристап на институциите вклучени во кривично- правниот систем за заштита од семејно насилство. За реализација на проектот е воспоставено формално партнерство со Министерството за труд и социјална политика на РМ и Министерството за внатрешни работи на РМ, а воспоставена е соработка и со Министерството за здравство на РМ. Во подготовката на процедурите учествуваат експертски групи во кои членуваат претставници од институциите од релевантните министерства како и претставници од три НВО кои континуирано обезбедуваат директни услуги за жртвите од семејно насилство: Националната СОС линија за жртви на семејно насилство при ОЖС, Шелтер центарот и Кризниот центар “Надеж”.