Macedonian
English
Акција Здруженска во партнерство со локални женски организации од шест македонски општини, во периодот јуни 2015 – јануари 2016 спроведе мониторинг на клучните фази на локалниот циклус на подготовка и усвојување на годишните програми и буџетот низ призма на родот и родово одговорното буџетирање. Со мониторингот беа опфатени општините Битола, Свети Николе, Куманово, Тетово, Гостивар и Дебар. По завршувањето на мониторингот и подготвувањето на сумарните извештаи, во периодот јуни-јули 2016 во секоја од општините вклучени во мониторингот организирани се средби за промоција на резултатите од буџетскиот мониторинг со наслов „Кон родово одговорно буџетирање“ со цел да се презентираат наодите од едногодишниот мониторинг пред претставници на локалната самоуправа и граѓанскиот сектор на локално ниво.
Ha средбите учествуваа претставници од различни структури на единиците на локалната самоуправа: координатори за еданкви можности на жените и мажите, членови на комисиите за еднакви можности на жените и мажите, претставници на релевантни сектори/одделенија од администрацијата, претставници на советот на општината, како и преставници на граѓанските организации активни на полето на унапредување на родовата еднаквост и правата на жените. Секоја од средбите беше организирана во партнерство со локалните женски организации кои беа вклучени во проектот: Радика-Де (Дебар), Женски Форум (Тетово), Етика (Гостивар), Клеа (Битола), Женски Центар „Жена на 21 век“ (Куманово) и ГИЗ Жени (Свети Николе).
Општ заклучок од одржаните средби е дека учесниците ги прифатија наодите од мониторинг извештаите и во секоја од општините претставниците на локалнта самоуправа се обидоа да дадат повратна информација за предметот на мониторингот. Недостигот од финансиски средства беше посочен како еден од клучните проблеми со кои се среќава локалната самоуправа при реализацијата на предвидените активности поврзани со родовата рамноправност. Некои од претставниците на локалната самоуправа истакнаа дека се свесни за проблемите со кои се среќаваат локалните жени. Заклучено беше исто така дека има уште простор за поактивен пристап од страна на општината и дека во иднина ќе треба поефективно да се користат капацитетите на граѓанските организации за надминување на состојбата.
Мониторингот беше спроведен во рамки на проектот на Акција Здруженска „Родовата рамноправност во локалните буџети“, поддржан од Проектот на УСАИД за граѓанско општество и спроведуван од Фондацијата Отворено општество – Македонија. Општа цел на проектот е унапредувањето на третманот на родовите прашања во буџетското планирање на локално ниво преку зајакнување на капацитетите и поддршка на локалните НВО за следење и застапување на родовата еднаквост во буџетските процеси.
