Macedonian
English
Од 11 – 22 март, 407 жени од Струмица , Кавадарци , Радовиш , Карпош и Центар го прекројуваа општинскиот буџет, во рамки на теренската кампања Жените Буџетираат!, реализирана во рамките на проектот Застапување на Родово инклузивни локални буџети.
Целта на кампањата е да го поттикне интересот на жените од заедницата за прашањата поврзани со јавните финансии и да ги поттикне на учество во локалните процеси на донесување одлуки.
Преку пунктови на јавен простор, тимовите од Организација на Жени – Струмица; Организација на жени Визија – Кавадарци; Женска Акција-Радовиш; Организација за унапредување на правата на еднородителските семејства Една Може – Скопје со поддршка на Акција Здруженска споделија информации со жените за висината и структурата на локалниот буџет и ги поттикнуваа да „одлучат“како со определен износ ќе го подобрат секојдневието на жените во заедницата. На кампањата и претходеше анализа на општинските буџетски документи за тековната година со цел да идентификуваат најмалку транспарентен износ кој ќе биде предмет на „прекројување“ од страна на жените од заедницата. Жените се запознаа со важноста и придобивките од поголемо вклучување во процесите на одлучување и беа ставени во позиција да донесуваат одлуки во корист на своите сограѓанки, давајќи повеќе од 509 предлози како приоритетни услуги за финансирање од општинскиот буџет. Во рамките на кампањата беа прибирани квантитативни информации за степенот на учество, информираноста и интересот на жените од локалната заедница за буџетското планирање и алокации. Резултатите од анкетата ја потврди комплетната неинформираност, исклученост и недоволно разбирање за релевантноста на буџетските одлуки за нивното секојдневие. Имено, само една од анкетираните жени во Радовиш ја знаеше висината на буџетот, додека останатите немаат ниту приближна претстава за износот. Илустративен пример е изјавата на една од жените, која на прашањето со колкав износ според нејзино мислење располага општинската власт, одговори “..околу 50 000 евра..„.
Сумарни информации за предлозите на жените по општини: Општина Карпош, Општина Центар, Општина Кавадарци, Општина Радовиш, Општина Струмица
