Студија „Политичкото учество на жените во Северна Македонија“

Студијата „Политичкото учество на жените во Северна Македонија“ е изготвена од Институтот за општествени и хуманистички науки (ИОХН) и од Акција Здруженска, а поддржана од Фондацијата за демократија на Вестминстер (ВФД)/Westminster Foundation for Democracy (WFD) јавно тело на Велика Британија посветено на поддршката на демократијата ширум светот. Првиот дел е самата студија, а вториот дел е збирка на индивидуални истражувачки трудови на сродни теми. Студија дава преглед на општата состојба со политичкото учество на жените во земјата преку приказ на податоци и нивна анализа се следат процесите, институционалните механизми, системските фактори, улогите на општествените актери и динамиката што о(не) возможува зајакнато политичко учество. Сликата за динамиките што влијаат врз политичкото учество на жените ја добиваме преку деловите од анализата што се однесуваат на: историјатот на женското движење и движењето за родова еднаквост; образовните можности во областите на родовите и женски студии; преку историјатот и анализата на политиките за родова еднаквост; законските и институционалните механизми и нивното функционирање, како и преку живите искуства на жените и активистите за родова еднаквост. Во анализата не се следи политичкото учество на жените единствено преку политичките партии како формални политички институции, туку преку нивното вклучување во процесите на одлучување и креирање политики на сите нивоа на општествено управување – образование, јавни претпријатија, месни заедници, локална самоуправа, институции на извршната и законодавната власт. Ваквиот пристап се темели врз претходно поставените заложби и теоретска анализа според која исклучиво формално политичкото учество или застапеност на жените нема да биде доволен услов или фактор за постигнувањето родова еднаквост во општествата. Пристапот што го користиме во анализата овозможува поттикнување и предизвикување на системските фактори што влијаат врз политичкото учество, а кои исто така се анализирани во текстот и се основа и за препораките што произлегуваат од анализата.