Во организација на ЛАГ Агро Лидер, неодамна се одржа настан „Цветен круг“, кој ги обедини креативноста, традицијата и енергијата на жените од руралните средини, нудејќи им простор за промоција и економска афирмација. Преку изложба и продажба на рачно изработени производи инспирирани од цвеќе – венци, сувенири, свеќи, везови, природна козметика и декоративни цветни аранжмани, учесничките ја претставуваат својата работа пред пошироката јавност.

Покрај продажниот карактер, базарот има и подлабока општествена улога. „Цветен круг“ претставува место за поврзување, размена на искуства и поттикнување дијалог, каде што женскиот глас добива поголема видливост и значење во заедницата. Организаторите упатуваат повик до граѓаните да ја поддржат локалната креативност и женското претприемништво, истакнувајќи дека ваквите иницијативи се важен чекор кон економско зајакнување на жените од руралните средини.